犬隻焦慮知識系列 - Threshold 底線

一隻狗點解有時會對一樣野緊張,有時又唔會呢?呢樣野就叫做 threshold,即係一個門檻。整體壓力有時未達標,狗仔就係非常ok的。但當壓力去到一個位,甚至超標,佢就會作出相對既反應。 以今日影相既狗狗為例,佢頭一小時都非常好,可以比我呢個陌生人摸同抱,但去到後半段忽然緊張甚至開始發出警告。就係因為佢開始疲勞,令佢壓力過左個 threshold,所以就會有所反應。 咁到底有乜野有機會令狗仔變得有壓力同焦慮,令佢接近甚至過左底線呢? 一般可以有以下呢堆: 同焦慮源頭既距離﹑有無空間後退﹑身體同體力狀態﹑有無其他令佢緊張既事物同時出現﹑有無突然環境改變之類… 有狗可能唔會護食,佢又唔會對門鐘聲有大反應。不過,當佢食緊野又有門鐘果陣,就可能會令佢出現護食行為。呢樣就係 threshold,有疊加效應的。 一般做所有呢類緊張類既訓練,正向訓練師都會以 under threshold 既程度去推進,或者剛剛貼住 threshold去進行。至於點樣判定,就係靠睇 body language。 有部份既狗,可能會因為環境變遷﹑附近裝修﹑屋企附近有狗發情或換左鄰居﹑天氣問題等等,令佢地出現短暫性既分離焦慮或其他相應既問題。 不過,呢類臨時過 threshold 而出現既問題,一般都會係生活回復正常後好快就會消失,除非佢長時間過晒底線啦。 覺得文章有幫助或值得多點人認識既,記得幫手推下分享下呀。

犬隻強迫症 Canine Compulsive Disorder

人有強迫症,狗都有 (Canine Compulsive Disorder, CCD) 。相比起分離焦慮,犬隻強迫症更加不為香港狗主所熟悉,更加值得推,所以大家可以幫手分享就更佳了。 狗既強迫症同人非常類似,都係一樣控制唔到自己不停重覆一個行為。一般會不停重覆既行為有: -不停進行同一活動,如:跑來跑去,轉圈等等 -不停幫自己清潔 -有幻覺,成日望住天定格郁都唔郁 -不停食野唔識停,乜都食,就算係非食物都狂吞 上面果堆野成日都有,咁點樣先叫做係「強迫症」? -好似完全失控停唔到落黎 -會做到自殘受傷都繼續進行 -影響日常生活 -每日最少有10分鐘有呢個情況,每次最少持續1分鐘 點解會有 CCD? CCD 可以係遺傳的,有部份犬種係特別容易中招,病變基因係 chromsome 7 上面出現。但有呢個基因,都唔一定會有;無呢個基因,都唔代表唔會出事。 //重點來了// 一般 CCD 成形之前,都係由焦慮所產生既轉移行為開始。即係狗狗好不安,然後佢會做D 奇怪行為,如:咬尾等等。如果主人唔為意點解令佢地出現呢類行為,而繼續施壓用錯方法,就會越來越差,有機會演變成真正既強迫症。比較嚴重既情況,係會有狗成條尾咬兜或者成隻腳自己咬斷都繼續咬的。 至於狗點會無啦啦覺得焦慮?其實好多時有呢類問題既狗狗,主人都係非常嚴厲,會鬧﹑會打﹑會嚇。然後佢地亦會好錫狗仔。賞罰分明係傳統智慧,但有時會出現一個令狗仔無所適從既情況:佢唔知你呢次埋黎你打我定係錫我。 一般開始有輕微強迫行為,主人只要可以完全停止所有打罵,兩三星期左右就會明顯有減少甚至無左個行為。

分離前焦慮行為

之前4篇短 post 大約講左一隻有分離焦慮傾向﹑甚至係有輕微分離焦慮症既狗仔大約會有既表現。今次就會講多少少,無論係高中低程度都有機會有既情況。 有無人屋企既狗仔會係你每一日出門之前,都會突然變得緊張﹑痴身﹑吠﹑亂轉圈﹑甚至利用攻擊去阻止你出門? 呢一個現象叫做分離前焦慮行為 predeparture anxiety behaviour。 一般狗仔學習係會利用聯想,狗仔係呢方面比人強大好多。 舉個例,你出門之前會刷牙﹑洗面﹑食早餐﹑換衫﹑執袋﹑拎鎖匙﹑著襪﹑著鞋﹑拎袋﹑開門﹑最後走人。當然人人可能有少少唔同,但每一個人出門前都會不自覺有一套規律,而狗狗就係你自己都唔知既情況下,已經捉到個規律,並且將佢地直接聯想到主人會離開﹑所以佢地會驚。 如果你既狗只係有之前4篇講既情況,可能都只係留意下,處唔處理就睇主人。但如果狗狗開始出現今篇講既野,就真係值得考慮下要唔要搵人幫手了。 因為分離前焦慮行為,基本上99%係分離焦慮既狗先會有的。 黎緊會有幾篇講下少少簡單遊戲或者家居 enrichment,可能會對令輕微或痴身既狗狗有幫助的。 覺得文章 OK 請分享~ 家犬好多時都因為主人既唔了解而受好多不必要既不壓力同苦的,特別係有機會有精神病患既狗。多少少人知道係咩一回事,就會少D D 狗無啦啦仲要比人打鬧。

輕微分離焦慮系列 - 4

有無人既狗平時識得去廁所完全無問題,但人一出左街返來就見佢屙到亂晒龍?呢個都係其中一個值得留意既野,亦係好多分離焦慮狗狗常見既情況。 有唔少主人都停留係一個比較傳統或擬人既諗法:「佢肯定係怪我地出左街唔理佢,特登亂咁屙想激死我地。」狗其實係好聰明,但絕對無咁聰明同攻心計的。如果真係咁攻心計,就唔會有咁多人鍾意狗。 通常成犬會突然亂咁屙尿,首先要排除身體狀況,其次就留意係咪有其他壓力來源令佢地不自控地屙錯。而分離焦慮既狗,就會係主人離開左之後好驚就會有呢個問題。 所以如果見到你既狗無人時會亂屙,不如好好了解到底係邊部份出左問題,對大家都會好少少。盲目以任何訓練方法企圖糾正呢一類亂屙既情況,其實都唔係好事,無論你係用打鬧既方式,或所謂比較正向既方式都一樣。唔係解決緊佢背後既成因,只專注要解決唔比佢亂屙,其實都唔見得令狗變得舒服。 輕微分離焦慮一般好難分辦係普通問題﹑少少驚﹑定係真係初期分離焦慮症。所以要靠主人多留意,會唔會係人離開左屋企之後,佢地有之前講過既問題。如果中兩樣以上,而又有持續或變差既傾向,就一定要更加留意了。 至於好多人都會直接問:咁要點做? 好老實,好難就咁答你,如果留個comment 就答到,呢門就唔會係一個專科,亦唔會係令全世界幾百萬狗仔受苦既一個病。 純粹少少緊張或痴身既狗,或做預防就簡單,之後都會出 post 講少少。但一旦演變左做分離焦慮症,咁就唔會咁易同咁快可以處理到了。點樣界定佢係病症定係一般焦慮? 同人既精神疾病一樣,比較外行既講法需要有兩個條件: 1. 長期而且持續 2. 影響正常生活 再準確少少,用返 DSM

輕微分離焦慮系列 - 3

狗仔吠叫可以有好多原因。如果有人係屋企果陣,佢都會不停吠,咁就可能係 demand barking﹑或門口有人行過﹑或門口有野令佢緊張想吠走佢之類。 不過,當無人係屋企果陣先會吠,間中可能又會有狼嚎咁既聲,咁就要留意了。中等到嚴重分離焦慮症既狗仔,可能會吠到癲左咁,完全唔停,好多時會比人投訴的。 但輕微分離焦慮或有呢類傾向既狗,好多時會係無人果陣吠多左,間中有狼嚎。咁上下時間佢又會自行訓下覺,醒左繼續吠下。通常輕微既只會多左吠,而唔會吠到聲撕力揭,佢地吠到累都會自行訓覺休息的。 不妨留意返。 如果只有一樣半樣,基本上可能唔關事或者係巧合。但如果之前講加埋之後講既,中左兩樣或以上,就值得開始留意下係咪需要處理或者做少少野令佢安心喇。

輕微分離焦慮系列 - 2

上回講到,如果主人返屋企時狗狗有異常興奮或短暫失控既情況,都有機會係輕微分離焦慮既表現。當然,有呢個情況唔一定代表有問題,但有問題既好大機會就有呢個情況。呢次都一樣。 有無人屋企既狗狗,會係無人既時候特別鍾意咬鞋﹑衫﹑或有主人味道既野?而有人係屋企果陣就完全無呢個問題? 有人會將呢樣野視為掛住主人,或者視為咩缺乏微量元素,更加會有人覺得狗狗純粹係破壞或當玩具咁咬。 如果有呢個情況,主人亦都需要多加留意了。 分離焦慮症唔係一個獨立既行為問題,佢唔會話有乜乜乜係佢獨有。當人或狗害怕同人分開﹑或者獨處果陣,會不自覺咁好驚同埋好大壓力,荷爾蒙分秘會開始亂晒龍。而果堆所謂既 symptoms 就係因壓力而生既行為。 點樣分辦佢係一般既行為問題,定係同分離焦慮有關連?其中一個最重要既關鍵就係分離,即係「有人陪 vs 獨處」。分離焦慮既狗,係有人陪果陣往往都係完全無問題的,但人一走開左就開始出事。 以往或者而家都好,大部份既主人都唔認識呢個問題。都仍然會堅信狗狗係挑戰佢地地位,或者刻意做壞事激死佢。我唔阻止人有呢個諗法,但呢個諗法往往都係為人同狗帶來傷害既諗法。 與其諗到隻狗咁聰明或賤格,倒不如放下成見,好好從頭認識過個問題會唔會更好? 共勉之。

輕微分離焦慮系列-1

分離焦慮症最為人熟悉既就係主人出門時狗狗出現各類破壞自殘或絕食行為。不過當去到呢一步,已經係中到嚴重了。但點樣可以係初期就留意到狗仔有分離焦慮傾向? 所有既行為問題都最好係預防,或者及早處理。 有無人試過每一日所有人出晒街一段時間跟住返屋企既時候,狗狗係異常興奮﹑失控咁跑來跑去﹑吠叫﹑轉圈之類,有一小段時間好似控制唔到自己停唔到落黎? 有其他人係屋企果陣,就算你幾日無見都唔會咁興奮,只有所有人走晒﹑跟住第一轉返去果陣係失控? 如果有咁既情況,大家就值得留意住狗狗的狀況了,因為呢個情況有幾高既機會係初期分離焦慮既先兆。 講緊既係興奮到失控,好似冷靜唔到落黎;而有其他人係屋企果陣佢又無咁興奮。 就算自己無呢個問題,如果知道身邊有朋友既狗狗有呢個情況,不妨將個 message pass 比佢地知,等佢地留意下。 有呢個情況唔代表有事,但通常有問題就會有呢個情況。唔洗太緊張,留意返就得。

Recent Posts
Archive
Search By Tags
Follow Us
  • Facebook Basic Square

Email: ask@bambiland.hk                                           Mobile | Whats'app: +852 9223 8817 

Address: 荃灣德士古道120號安泰國際中心2604室 (停車場入口:馬角街)

  • Facebook Basic Black
  • Whatsapp-512
  • Black Instagram Icon